Компаниите од ЕУ не можат да си дозволат да ги прекинат деловните врски со Кина, изјави еврокомесарот за трговија Валдис Домбровскис, нагласувајќи ја потребата за рамнотежа и проширување на кругот на деловни партнери.
„ЕУ треба да ја продолжи соработката со Кина во духот на прагматизмот и без наивност. На нашите трговски односи им треба поголема рамнотежа и реципроцитет“, рече претставникот на ЕУ, сугерирајќи дека наместо повлекување, фокусот треба да биде на подобро управување со ризикот и диверзификација.
Покрај Кина, се промени и односот на ЕУ со уште еден важен трговски партнер, САД, нагласи Домбровскис.
„Трансатлантските односи се обновија“, тврди тој, но постои „длабока загриженост“ за американскиот антиинфлациски закон и придобивките што тој ги носи за американските компании.
Законот предвидува „зелени субвенции“ кои ја дискриминираат европската автомобилска индустрија и индустријата за обновлива енергија, производителите на батерии и големите индустриски потрошувачи на енергија, објаснува претставникот на ЕК.
„Ќе разговарам за овие прашања утре со моите американски колеги кога ќе патувам за Вашингтон “, додаде тој.
Извор: МИА