Собранието на Република Македонија денеска треба да ја одржи 69. седница.
На дневен ред се предлог одлуките за изменување на Одлуката за избор на претседатели, заменици на претседателите, членови и нивни заменици на комисиите на Собранието на РМ, за изменување на Одлуката за основање на пратенички групи на Собранието на РМ за соработка со парламентите на други држави и избор на претседатели и членови на пратеничките групи на Собранието на РМ за соработка со парламентите на други држави, како и за изменување на Одлуката за избор на членови на Комитетот за односи меѓу заедниците.
Пратениците меѓу другите точки ќе расправаат и по предлог одлуките за изменување на Одлуката за именување на претседател, потпретседател, членови и заменици-членови на Националниот совет за евроинтеграции, за избор на шеф, членови и заменици-членови на Делегацијата на Собранието на РМ во Парламентарното собрание на Организацијата за безбедност и соработка во Европа (ПС ОБСЕ), како и за избор на претседател, потпретседатели, членови и заменици – членови на Делегацијата на Собранието на РМ во Парламентарниот комитет за стабилизација и асоцијација.
На денешната седница се и измените и дополнувањата на Законот за оружјето, на Законот за производство и промет на вооружување и воена опрема, на Законот за јавните претпријатија, на Законот за трговските друштва, Дополнетиот предлог на закон за индустриски – зелени зони, како и Предлог законот за поддршка на домашната музичка продукција, сите во второ читање.
Дневниот ред на седницата е дополнет и со Предлог законот за матичен број, со Предлог законот за дополнување на Законот за просветната инспекција и со Предлог законот за изменување и дополнување на Законот за сигурност во железничкиот систем, сите во прво читање.
Пратениците меѓу другото треба да ги разгледаат и измените и дополнувањата на Законот за студентскиот стандард, на Законот за Бирото за развој на образованието, на Законот за учебници за основно и средно образование, сите по скратена постапка.
###