После една година и речиси девет месеци поминати во затворската келија, Архиепископот охридски г.г. Јован, за првпат доби можност за еднократна посета од страна неговите собраќа, Епископите на Православната Охридска Архиепископија, во просторот предвиден за посети, во затворот Идризово.
На 23-ти Август 2013 година, Нивните Преосвештенства, Епископот полошко-кумановски и Местобљустител дебарско-кичевски г. Јоаким, Епископот брегалнички и Местобљустител битолски г. Марко и Епископот стобиски и Местобљустител струмички г. Давид го посетија Блаженејшиот Архиепископ охридски и Митрополит скопски г.г. Јован и се задржаа во краток разговор, пренесувајќи му ја љубовта, но и прозбите од верниот народ за неговиот благослов и молитви.
Архиепископот охридски Јован ги увери Епископите дека се чувствува малку подобро со здравјето, а на сите припадници на Православната Охридска Архиепископија им го испраќа неговиот архипастирски благослов, поттикнувајќи ги секогаш да ја чуваат радоста во најразличните животни околности.