Србија ќе издава долгорочни државни хартии од вредност во вкупна вредност од 340 милиони евра, објави денеска Нова економија, повикувајќи се на одлуките на Владата до кои имала пристап и наведува дека обврзниците ќе се продаваат со директно преговарање со квалификуван инвеститор.
Причина за новото задолжување е финансирањето на буџетскиот дефицит, рефинансирањето на достасаните обврски по основ на јавниот долг, како и финансирањето на тековната ликвидност и стекнувањето финансиски средства, се наведува во одлуките на кои се повикува Нова економија.
Обврзниците ќе бидат издадени на 23 август годинава, а се поделени во две емисии.
Првата група обврзници со вкупна вредност од 250 милиони евра доспева во август 2025 година. Втората група, вредна 90 милиони евра, доспева во август 2026 година.