Во Детското село Песталоци во Троген, Швајцарија, се одржа летен камп на кој присуствуваа и ученици од општина Струмица.
Во рамките на проектот „Јакнење на меѓуетничката соработка во општините“, Струмица спаѓа меѓу првите пилот општини кои ги имплементираа содржините од овој проект, меѓу кои е и интеркултурната размена и летниот камп во Швајцарија, каде ученици од повеќе земји се едуцираат за детските права, недискриминација, полова рамноправност и решавање на конфликти.
Оваа година на летниот камп присуствуваа ученици од училиштето „Маршал Тито“ во Струмица, кое е вклучено во програмата на пилот училиштата кои ги имплементираат содржините од проектот. Во Детското село Песталоци присуствуваа и ученици од Молдавија и Србија, кои заедно со нашите ученици ги споделија искуствата и создадоа предлог активности за нови акциони планови за имплементација во наредниот период.
На летниот камп освен задолжителните едукативни часови, учениците добија можност и за посета на научната изложба Технорама, посета на историски и други места во Швајцарија.
Градоначалникот на општина Струмица Зоран Заев, како минатата, така и оваа година овозможи логистичка, техничка и финансиска поддршка на учениците кои учествуваа во содржините на овој проект, а кој долгорочно е предвиден да трае до 2020 година, со опфат на поголем број училишта и општини во Република Македонија.