Половина куќа се урна во стариот дел на Охрид на улицата Климентов универзитет. Најоштетен е покривот на куќата која со години е во лоша состојба.
Во неа сам живее 42 годишниот Александар Сандев, кој е невработен и не прима социјална помош.
„Беше еден силен потрес. Се вознемирија и комшиите и ми кажаа дека нешто се случило, но за среќа во тој момент јас не бев во куќата. Очекувам дека ќе дојдат и преставници на централната или на локалната власт да ја видат состојбата на куќата но и да видат во какви услови живеам со години. Живеам многу тешко и едвај врзувам крај со крај, но во моментов најмногу ми треба дом“, вели Сандев.
Во куќата каде што живее Александар веќе 18 години нема струја. Тим од Центарот за Социјални работи од Охрид го посети Александар и му понуди помош со цел да оствари право на социјална помош.
Во стариот дел на Охрид има десеттина објекти кои се пред распаѓање и за кои локалните жители бараат да бидат превземени мерки од страна на општината.
