Прилеп, Битола и уште 7 општини во Пелагонискиот регион се наоѓаат на црната листа, a особено загрижувачки се податоците за овие две општини за нивото на природниот прираст. Имено, минатата година во Прилеп починале 897 лица, а се родиле 773 бебиња со што Прилеп има негативен прираст од 124 лица.
Македонските демографи предупредуваат дека во последните неколку години нашата држава бележи негативен природен прираст, што за земја со два милиона жители подразбира изумирање на нацијата. Статистиките покажуваат дека белата чума сериозно го загрозува и градското население, а не само руралното.
Негативниот прираст најсилно е изразен во големите македонски градови на југозападна Македонија, а апсолутен рекордер е Битола. Според податоците на Државниот завод за статистика, по Битола, Прилеп се наоѓа на второто место на оваа листа со 90 починати повеќе од бројот на новородените оваа година. Опаѓа бројот на бракови во Прилеп, а расте бројот на разводи, покажуваат официјалните податоци од Заводот за статистика. Жителите на Прилеп тврдат дека невработеноста е основната причина за опаѓањето на наталитетот.
Според податоците на Заводот за статистика, во регионот владее голема депопулација, што е последица на фактот дека за една декада наталитетот е преполовен.
А.Ш.