„Убијци“, „Фашисти“, „СОНК убијци на деца“ се само дел од натписите испишани синоќа на ѕидовите од градинката „Росица“ во Ѓорче Петров. Ова доаѓа два дена по заканите за директорката и вработените во градинката.
Sидовите на објектот се ишарани во текот на ноќта. Состојбата утрово први ја затекнале вработените.
Градоначалникот на Ѓорче Петров, Александар Стојкоски, бара итно пронаоѓање на сторителите.
„Го осудувам овој чин на вандализам насочен кон општествените добра. Ова се толкува како директен притисок и закана врз вработените во градинката. Апелирам до МВР под итно и во најбрз можен рок да ги пронајде сторителите и да ги санкционира“, вели градоначалникот Стојкоски.
Во текот на неделава, родител на две деца кои биле згрижени во градинката вербално напаѓаше вработени. За него беше неприфатливо решението, неговите деца поради штрајкот да бидат сместени во друг објект. МВР ќе истражува дали тој случај е поврзан со вандализмот од синоќа.