Британскиот премиер Борис Џонсон и германскиот канцелар Олаф Шолц денеска одржаа заедничка прес-конференција во Лондон на која Џонсон кажа дека и Велика Британија и Германија делат чувство на „ужас и одбивност“ кон „бруталноста што ја претрпе украинскиот народ“, што го вклучува и утринскиот ракетен напад врз цивилите во украинскиот град Краматорск.
Џонсон кажа дека нападот од утринава на железничка станица во источна Украина покажува „колку длабоко потонала војската на Путин“.
-Воено злосторство е да се напаѓаат цивили. Злосторствата извршени во Украина нема да останат неказнети, рече Џонсон.
Џонсон повтори дека „Путин не смее да успее“ и најави нови британски санкции против Русија, што се однесуваат на замрзнувањето имот и забрана за патување.
Тој го пофали својот германски колега за неговата „решителност да стави крај на зависноста од руската енергија“ и додаде дека „тоа не е лесно за никој од нас и затоа ги поздравувам историските одлуки донесени од владата на Шолц да се оддалечи од руската енергија“.
Џонсон додаде дека Германија и Велика Британија им се придружиле на десетиците земји кои испраќаат оружје и заштитна опрема како шлемови и панцири во Украина.
-Европа каква што ја знаевме до пред само шест недели веќе не постои. Инвазијата на Путин е удар врз темелите на безбедноста на нашиот континент, но неговата желба да не подели очигледно не вроди со плод, рече Џонсон.
„Напротив, Путин ја обедини Европа и целата трансатлантска Алијанса за поддршка на Украина и взаемна солидарност“, кажа тој, додавајќи дека Велика Британија ќе испрати уште оружје во Украина, во вредност од 100 милиони фунти.
Извор: МИА