Македонскиот ракометен првак Вардар денеска на прес конференција го претстави новото засилување Алекс Душебаев кој во следните две сезони ќе го носи црвено-црниот дрес.
– Мислам дека потпишав за добра екипа, која ќе игра во Лигата на шампионите и во СЕХА лигата. Можев да бидам и дел од Хамбург, истакна Душебаев.
Алекс Душебаев има 21 година и игра на позиција десен бек. Тој е син на Талнат Душебаев, тренерот на Атлетико Мадрид. Оваа сезона Алекс требаше настапува токму во Атлетико, но финансиските проблеми на шпанскиот клуб беа пречка да се оствари нивната соработка.
– Требаше да тренирам со татко ми, но оваа сезона не се случи тоа поради проблемите. Никогаш не се знае можеби во иднина ќе ми биде и тренер. Тој сепак ми даде совети дека ова е добар тим каде ќе можам да напредувам, рече Алекс.
Душебаев попладнево ќе се приклучи на тимот кој е на подготовки во Крањска Гора, а тој досега беше дел од репрезентацијата на Шпанија, која на младинското Светско првенство го освои второто место.
Првиот човек на Вардар, Сергеј Самсоненко во врска со голманската позиција, која не е пополнета најави дека наскоро ќе се случи и тоа.
– Ние ја комплетираме екипата. Ќе има и засилување и на голманската позиција. Или тоа ќе биде врвен голман или ќе биде млад и талентиран. Но наскоро ќе биде познато.