Европска Унија го осудува предлогот на руската Дума до претседателот на Русија, Владимир Путин, да ја признае независноста на Доњецк и Луганск во Украина, изјави денеска шефот на дипломатијата на ЕУ, Жозеп Борел.
– ЕУ остро ја осудува одлуката на руската Државна дума да го повика претседателот Путин да ги признае областите Доњецк и Луганск во Украина како независни ентитети. Ова признание би било јасно прекршување на договорот од Минск, објави Борел на Твитер.
Тој ја повтори поддршката на ЕУ за независноста, суверенитетот и територијалниот интегритет на Украина во меѓународно признатите граници.
Во име на ЕУ, тој ја повика Русија „да се држи до своите обврски“ и да се вклучи во разговорите во рамките на Нормандискиот формат и Трилатералната контакт група.
Извор: МИА