Ситуацијата во Украина е „многу сериозна“, изјави денеска францускиот министер за надворешни работи Жан-Ив Ле Дриан, јави дописникот на МИА.
– Сметам дека ситуацијата во Украина е многу сериозна, да не се залажуваме себеси, рече тој за Франс Интер.
Русија си даде средства да започне агресија против Украина, тоа е реалност, подвлече Жан-Ив Ле Дриан.
-Според моите сознанија, не е донесена одлука во врска со ова, но со оглед на распоредувањето на руските војници на границата веќе неколку месеци, како и воените маневри во тек, „има причина за загриженост“.
Западните земји ја обвинуваат Русија дека во последните месеци собрала неколку десетици илјади војници, тешка артилерија и ракетни системи во близина на границите на Украина и дека организирала воени маневри во Белорусија, што ги зголемило стравувањата од инвазија на украинска територија. Москва негира таков проект.
Извор: МИА