Протестот на возачите на камиони против задолжителната вакцинација во канадската престолнина, кој трае речиси две недели, станува се потензичен. Полицијата во Отава предупредува на „непредвидливи“ и „одлучни“ демонстранти, додавајќи дека во четвртина од возилата што го сочинуваат т.н. Конвојот на слободата се наоѓаат деца, кои би можеле да бидат загрозени при полициски активности.
Досега се отворени околу 80 истраги за можни злосторства, а уапсени се повеќе од 20 демонстранти, од вкупно околу илјада. Иако повеќето од протестите беа мирни, полицијата во Отава вели дека е загрижена поради екстремистичката реторика која доаѓа од екстремно десничарските групи присутни на протестот. Покрај расистичките и хомофобични навреди, некои демонстранти ги истакнаа и нацистичките симболи.
Покрај апсењата, полицијата изрече низа казни и се обиде да ги предупреди демонстрантите да се држат настрана од одредени локации каде што го попречуваат сообраќајот, а некои демонстранти одбија да ги слушаат. Полицијата вели дека добиле и лажна закана за бомба, која, според нив, имала за цел „да го одвлече вниманието и да ја збуни“ полицијата, пренесува Би-Би-Си.
Дополнителна нервоза кај граѓаните на Отава предизвика постојаното трубање на камионџиите. Но, вчера судијата во Отава им забрани да трубат во времетраење од 10 дена.
Според истите медиуми, еден полицаец бил нападнат додека учествувал во акција за одземање гориво. Заменик началникот на полицијата Стив Бол на вчерашната прес-конференција рече: „Нашата порака до демонстрантите останува иста: Не доаѓајте. Ако дојдете, ќе има последици“.
На истата прес-конференција, Бел рече дека пронашле околу 100 камиони во кои има деца и контактирале со агенциите за деца поради загриженост за бучавата, издувни гасови и незадоволително ниво на хигиена.
На околу 1.190 километри од Отава, демонстрантите го блокираа најфреквентниот граничен премин меѓу САД и Канада, принудувајќи ги патниците да одат по околни патишта. Преминот сепак во меѓувреме е делумно отворен.