Денеска, на градските гробишта во Бутел, официјални странски и домашни делегации положија цвеќе пред споменикот на загинатите од земјотресот во Скопје, што се случи пред точно педесет години.
Во чест на загинатите, венец положи и официјална делегација на Град Скопје, предводена од градоначалникот на Град Скопје, Коце Трајановски и претседателот на Советот на Град Скопје, Ирена Мишева.
Почит на жртвите од урнатините во катастрофалниот земјотрес во Скопје, далечната 1963 година, со положување цвеќе, изразија и делегација од Кабинетот на претседателот на Владата на Република Македонија, делегација од Кабинетот на претседателот на Собранието на Република Македонија, предводена од Трајко Вељановски, делегации составени од претставници од политичките партии во Република Македонија, делегации од сите општини во градот Скопје, претставници од Црвен крст на град Скопје и на РМ, делегација на Армијата на Република Македонија, претставници од Јавните претпријатија и Јавни културни установи на Град Скопје, претставници од институции во нашава земја, како и граѓани на Републикава.
Цвеќиња на гробиштата на загинатите од земјотресот, положија и официјални делегации од странство, меѓу кои: делегација од Република Албанија; Република Австрија; Кралството Белгија; Република Бугарија; Република Кина; Република Хрватска; Република Чешка; Република Франција; Сојузна Република Германија; Република Унгарија; Исламска Република Иран; Република Италија; Јапонија; Кралството Холандија; Република Полска; Руската федерација; Република Србија; Република Словенија; Кралството на Шведска; Кралството на Шпанија; Швајцарија; Република Турција; Украина; Обединетото кралство на Велика Британија и Северна Ирска; Соединетите Американски држави, како и делегација од Европската Унија и Обединетите Нации и УНИЦЕФ.
