Британската кралица Елизабета Втора го одобри денеска законот со кој се легализираат истополовите бракови во Англија и Велс, кој вчера беше усвоен од Долниот дом на британскиот Парламент.
Одобрувањето од кралицата е само формалност и последен чекор во процедурата, со која предлогот ќе стане закон.
Со законот им се овозможува на хомосексуалните двојки да склучат граѓански брак и брак на верски церемонии, но медиумите потсетуваат дека Англиканската и црквата на Велс тоа не можат да го направат.
Исто така, им се дозволува и на оние кои претходно стапиле во „граѓанско партнерство“, кое подразбира слични права и обврски како и бракот, да го официјализираат својот однос со брак.
Премиерот Дејвид Камерон го поддржа законот, но тој предизвика поделби во неговата Конзервативна партија и дебати во Парламентот.
Шкотската Влада минатиот месец подготви свој закон за истополовите бракови, но Парламентот на Северна Ирска одлучи да го блокира таквиот правен акт.