Државниот секретар на САД Џон Кери денеска доби поддршка од Арапската лига за напорите за обновување на израелско палестинските мировни преговори, јави БТА.
Кери, кој е во шеста посета на Блискиот Исток во изминатата половина година, се сретна во Јордан со претставници на Арапската лига и на девет од државите, кои членуваат во организацијата, поддржувајќи го планот за израелско-палестински мир, предложен од Саудиска Арабија.
Кери го повика Израел да ја разгледа внимателно мировната иницијатива на Арапската лига од 2002 година, која во минатото ја отфрлуваше.
– Израел треба внимателно да ја разгледа иницијативата, која му ветува на Израел мир со 22 арапски земји и 35 муслимански земји – вкупно 57 земји кои ја очекуваат можноста да склучат мир со Израел, рече Кери.
Тој изрази уверување дека е на пат да постигне обновување на мировните преговори меѓу Израел и Палестинците и одново изрази надеж дека двете страни ќе седнат на преговарачка маса.