Авганистан ќе западне во граѓанска војна доколку талибанците не формираат инклузивна влада, предупреди пакистанскиот премиер Имран Кан.
– Ако не ги вклучат сите фракции, порано или подоцна ќе имаат граѓанска војна, рече Кан во интервју за Би-Би-Си Урду емитувано доцна синоќа.
Се чини дека неговите коментари се првата „тешка порака“ до милицијата од страна на земја која долго време беше обвинувана дека ги поддржува.
– Тоа би значело нестабилен, хаотичен Авганистан и идеално место за терористите. Тоа е загрижувачки, додаде тој.
Коментарите на Кан доаѓаат додека дипломати од Русија, Кина и Пакистан одржаа заеднички состанок со шефот на талибанската администрација во Кабул за да извршат притисок за инклузивна влада.
Специјалните претставници од соседите на Авганистан, исто така, се сретнаа со поранешниот претседател Хамид Карзаи и водечкиот политичар Абдула Абдула, соопшти пакистанското Министерство за надворешни работи.
Талибанците во вторникот соопштија некои нови членови на владата во првото проширување на нивниот кабинет, вклучително и неколку членови од етничките малцинства, но нема жени.
Министерот за надворешни работи на Пакистан, Шах Махмуд Куреши, денеска изјави дека неговата земја сака светот да соработува со Талибанците за да избегне хуманитарна криза, но не брза да ја признае нивната влада.
Меѓународната заедница и соседите на Авганистан ги испитуваат своите опции за справување со тврдокорните исламисти, откако талибанците ја презедоа власта во земјата минатиот месец.
Кан, исто така, ги повика талибанците да дозволат девојките во Авганистан да продолжат со студирањето, нарекувајќи ја забраната за женски училишта неисламска.
– Идејата дека жените не треба да се образуваат едноставно не е исламска. Тоа нема никаква врска со религијата, рече Кан.