Последниот Евреин во Авганистан, 62-годишниот Зебулон Симанатов, најпосле го напушти Авганистан откако талибанците ја преземаа контролата врз земјата минатиот месец.
Симанатов ја преминал границата со соседната земја минатиот викенд, јави денеска израелскиот јавен сервис Кан.
Емитувани се и снимки од петдневното патување и спасување на Симанатов, заедно со десетици деца и жени.
Тој долго време одбиваше да го напушти Авганистан и покрај заканите, но по целосното повлекување на САД од земјата на крајот на август, притисокот растеше да замине и тој, јави Бета.
Бизнисменот Моти Кахана, кој има израелско и американско државјанство, рече дека одлуката за заминување била под влијание на соседите кои му рекле на Симанатов да си замине и да ги земе своите деца, бидејќи и тие се во опасност.
Кахана води приватна компанија која му помогна на последниот Евреин да го напушти Авганистан.
– Неговиот проблем не се талибанците, туку Исламска држава, Ал Каеда. Во неговиот случај, постојат и други лудаци кои се појавуваат секој ден. Се плаши од нив, рекол Кахана за Кан.