Хасан Насралах, лидерот на проиранското либанско движење Хезболах, денеска соопшти дека првиот ирански брод со гориво е на пат за Бејрут, главниот град на Либан, јавува Анадолија
Тој соопшти дека првиот брод кој превезува гориво испловил од Иран и додаде дека ќе го следат и други бродови кои исто така ќе превезуваат нафта. Исто така, ги предупреди Израел и САД да не го пресретнуваат бродот.
Во последните денови на бензинските пумпи во Либан се видливи долги редици, а поголемиот дел од луѓето се соочија со проблеми поради недостиг на дизел, потсетува Анадолија.
Либан се соочува со сериозна економска криза, локалната валута ја загуби речиси целата вредност во однос на доларот, а низ улиците често се одржуваат масовни протести и собири.
Оваа арапска држава не успеа да формира нова администрација по оставката на Владата на Хасан Диаб на 10 август 2020 година, шест дена по катастрофалната експлозија во пристаништето во Бејрут.