Автобус на српска транспортна компанија со 34 патници денеска се превртел на германскиот автопат А13, откако удрил во заштитната ограда, јавија локалните медиуми.
Несреќата се случила на делницата меѓу Стаков и Фрајвалде, во сојузната држава Бранденбург. Според полицијата, автобусот се превртел на страната, по што се лизгал стотина метри во просторот меѓу сообраќајните ленти.
Автобусот утрово тргнал од Белград кон Берлин, а според српските медиуми, седуммина од повредените се државјани на Србија. Германската полиција засега не ги наведува причините за сообраќајката.
Повредените веднаш биле префрлени во болниците во блиските градови, а во акцијата за спасување учествувале и хеликоптери.