Македонската и косовската академија на науките и уметностите при крајот на септември ќе потпишат спогодба за соработка, а планирано е да биде потпишан и конкретен протокол за соработка.
Ова е договорено на денешната средба во Скопје меѓу раководствата на двете академии предводени од претседателите Владо Камбовски и Хивзи Ислами.
Академик Камбовски по средбата изјави дека протоколот ќе опфати соработка на научно-истражувачки проекти, организирање на научни конференции и соработка на планот на уметничките активности како што се изложби и промоции на книги.
– Најважно е дека денеска разговаравме со нашите пријатели со кои делиме потполно идентични мислења дека улогата на двете академии е да ги надминеме предрасудите што постоеле меѓу нашите општества и да ги отвораме патиштата на науката, културата и уметностите за разбирање, дијалог и пријателство меѓу нашите народи како влог во заедничката иднина, а тоа е Европската унија, изјави Камбовски по средбата со неговиот косовски колега.