Огромна експлозија во фабрика за алуминиумски легури во кинеската централна провинција Хенан се случи рано утрово, а причина за катастрофата се силните врнежи и поплавите во регионот, соопштија властите.
Според надлежните, сите вработени во фабриката и жителите на блиската област биле навреме евакуирани и нема извештаи за загинати и повредени.
На снимките од страотната експлозија, проследена со громогласен татнеж, се гледа и како пламените јазици високи десетици метри ја голтаат разнесената фабрика.
Властите соопштија дека експлозијата се случила откако водата од блиската река Јинге околу четири часот утрото го пробила заштниот ѕид, се излила и поплавила погон во кој имало хемиски раствор со висока температура. Компанијата Денгфенг Пауер Лимитед, во чија сопственост е уништената фабрика, соопшти дека навреме била исклучена струјата, заедно со евакуацијата на работниците. Во извештаите на кинеските медиуми се потенцира дека фирмата ги поминала сите седум ригорозни инспекции за заштита на животната средина.