Боливискиот министер за надворешни работи, Давид Чокуехуанка изјави дека авионот, со кој боливискиот претседател Ево Моралес се враќал во Боливија од Москва бил пренасочен кон Австрија, откако Франција и Португалија одбиле да му одобрат да мине низ нивниот воздушен простор, поради сомневањата дека во него се наоѓа Едвард Сноуден.
Чокуехуанка изјави дека Сноуден не бил во авионот и изрази зачуденост од „неправедното однесување“ кон боливискиот претседател.
Министерот истакна дека Франција и Португалија наеднаш ги промениле одлуките за одобрување за премин преку нивниот воздушен простор, повикувајќи се на технички причини.
Боливиските власти сметаат дека сепак ваквата постапка е последица на сомневањата на Париз и Лисабон дека во авионот бил поранешниот соработник на ЦИА и НСА, кои од САД е обвинет за шпионажа.
Моралес, кој беше во посета на Русија, изјави претходно дека Боливија ја разгледува можноста да му додели политички азил на Сноуден.