Со добивањето на решението за ставање во употреба на 2.750 метри долгата делница од секундарната гасоводна мрежа, а добиено од Републичкиот инспекторат за садови под притисок при Министерството за економија, Јавното претпријатие за енергетска дејност „Струмица гас“ почна и домаќинствата да ги приклучува на гасоводната мрежа.
Според директорот на претпријатието, Зоран Китанов, на гасоводната мрежа ќе се приклучуваат домаќинствата кои гравитираат околу улиците: „Ѓорги Упчев“, „Маршал Тито“, „Ристоман Попчевски“, „11-ти Септември“, „Епименонда Поп Андонов“, „Елка Јанкова“, „Спиро Захов“, „Младинска“, „Илија Чучков“ и „Мара Минанова“.
– Оваа година ни беше доста успешна, со доста заштеди за локалната самоуправа. Сега почнуваме со еден друг дел, со приклучокот на домаќинствата, со индустријата и за таа цел ние пролетта продолживме со работа и пред еден, еден и пол месец завршивме со една друга делница, која што е со должина од околу три километри и за која сите испитувања и тестирања успешно завршија и од Републичкиот инспекторат за садови под притисок при министерството за економија добивме решение за употреба на новите 2.750 метри кои што се нова делница од секундарната мрежа со помал обем и опфаќа повеќе улици. Целата оваа делница е испитана, одобрена и подготвена за пуштање во употреба и за приклучок на домаќинствата. Исто така, пристигнати се и сетовите за приклучок на куќните ормари од реномираната компанија ЦМЦ – ЕЛСТЕР, нашите екипи се на терен и почнуваме со реализирање на поднесените барања. Во меѓувреме, набавивме и уште три мат модули, со што уште повеќе ќе се зголеми нашата моќ за снабдување и пренос на гасот, вели Зоран Китанов, директор на ЈПЕД „Струмица гас“.
Од „Струмица гас“ додаваат дека интензивно ќе работат и во летните месеци се со цел, во новата грејна сезона на што поголем број домаќинства да им овозможат да ги почувствуваат благодетите од природниот гас.
Струмица е прва системски гасифицирана општина во Република Македонија, чиј пример почнаа да го следат и другите општини.