Со финансиска поддршка од Швајцарската агенција за развој Јавното претпријатие за комунални работи „Услуга“ успешно го реализира проектот „Урбан водоснабдителен и санитарен систем“.
Дел од овој проект е и Фабриката за вода, изградена по европски стандарди, од која Берово и неколку населени места во општината се снабдуваат со вода.
– Со изградбата на Фабриката за вода и пречистителната станица, покрај снабдувањето со вода од највисок квалитет, паралелно го решивме и проблемот со заштитата на биодиверзитетот на реката Брегалница, изјави Љупчо Дракалски, директор на ЈПКР „Услуга“.
Градоначалникот на Берово Драги Наџински, изјави дека со изградбата на овој „Урбан водоснабдителен и санитарен систем“, општината Берово во целост ги имплементира законските обврски за зачувување на животната средина и здравјето на луѓето, а со тоа се овозможува уште подинамичен развој на туризмот, како значајна стопанска гранка за економијата во Берово и поширокиот регион на Малешевијата.