Најмалку пет лица загинаа откако ретката појава на торнадо и обилните дождови предизвикаа хаос на југо-истокот на Чешка, соопштија денеска чешката полиција и службите за итни случаи.
Во невремето, повредени се околу 200 лица, од кои 60 се сместени во болниците, наведуваат чешките власти.
Торнадото синоќа опустоши седум села во областа Јужна Моравија, притоа уништувајќи куќи и откорнувајќи покриви. Има мноштов искршени прозорци, а силните ветрови уништиле и автомобили.
BREAKING: Tornado causes major damage in the Czech Republic pic.twitter.com/TdSm87Z4gG
— BNO News (@BNONews) June 24, 2021
Силата на ветерот достигна и 322 километри со што торнадото достигна четврти степен што е најсилно во последните неколку децении.
Службите за итна помош денеска продолжуваат со потрагата по луѓето заробени под урнатините, а стотици пожарникари одат од куќа до куќа.
Чешката армија испрати војници и тешка опрема во регионот, пренесе ДПА.
Министерот за внатрешни работи, Јан Хамачек, кој ситуацијата ја опиша како „голема катастрофа“, исто така, се упати кон областа. Премиерот Андреј Бабиш се очекуваше попладнево да го стори истото, по неговото враќање од самитот на ЕУ во Брисел.
Владата вети финансиска поддршка на погодените семејства, од кои некои го загубија целиот дом.
Чешката метеоролошка служба CHMU подоцна потврди дека штетата е предизвикана од торнадо, што е ретка појава во регионот. Последната бура од овој калибар во Чешка била регистрирана пред три години.