Со цел подобрување на условите за движење на пешаци и возила и санирање на оштетувањата Општина Охрид спроведува градежни активности за рехабилитација и санација на улици и пешачки патеки во стариот дел на Охрид.
Моментално се работи на улицата „Самоилова“ каде што се врши прередување на старите гранитни плочки и поставување на нова тампон основа. На деловите каде што има поголеми оштетувања се поставуваат нови гранитни плочки.
Од Општина Охрид информирааат дека откако ќе финишираат активностите за рехабилитација на улица „Самоилова“ ќе започнат градежни активности за рехабилитација на улицата „Коста Абраш“ како и на други улици каде што се евидентирани оштетувања. Се очекува да бидат рехабилитирани и прередени 2.500 метри квадратни.
Овие активности се дел од програмските планови за партерно уредување и за таа намена од буџетот на Општина Охрид се предвидени 1,2 милиони денари.
Со средства на Општина Охрид изминатиот период во стариот дел на градот беа изградени потпорни ѕидови на две локации.