Пратеникот Лазе Таневски од СДСМ со лична донација се вклучил во опремувањето во вакцинален пункт на салата „Билјанини извори“ во Охрид. Тој на „Фејсбук“ објави дека донирал два компјутера.
„Денес, како пратеник во Собранието на РСМ, ја посетив спортската сала “Билјанини Извори” – Охрид која заради потребите на проектот за масовна вакцинација е во фаза на реорганизација во Регионален центар за вакцинација. Како знак на моја целосна поддршка направив донација на два персонални комјутери за потребите на вакциналните пунктови кои ги предадов на градоначалникот на Општина Охрид Константин Георгиевски. Во оваа прилика им посакувам успешна работа на сите вклучени во процесот и воедно ги повикувам и мотивирам граѓаните да се пријават во што поголем број бидејќи вакцината е единствениот начин да го заштитиме нашето здравје и да се справиме со вирусот“, стои во објавата на пратеникот.
Министерството здравство извести дека уредувањето на спортските сали во вакцинални пунктови го прават градоначалниците со спонзорства. Во салата „Билјанини извори“ во Охрид вчера беа поставени реклами од спонзорите на вакциналните кабини, за разлика од кабините во салата Борис Трајковски“ на кои доминираат пораки за носење маски, миење раце, одржување растојание како и известувања за корисноста од вакцинирањето. Такви пораки, засега во салата во Охрид, нема, но на триесетина места се поставени реклами на приватници кои го помагаат уредувањето.
Освен во Охрид, спортски сали се уредуваат во вакцинални пунктови по примерот на салата „Борис Трајковски“ во Битола, Кавадарци, Штип, Куманово и Тетово.