За околу два месеци се очекува да започне со работа линијата за секундарна селекција на отпад во Прилеп. Пред една година прилепското ЈП „Комуналец“ го потпиша договорот со хрватската фирма „Техникс“ од Вараждин за изградба на фабрика за секундарна селекција.
Во игра беа уште две странски компании, но според директорот на ЈП „Комуналец“ хрватската компанија доставила најприфатлива понуда, односно за 14,7 милиони денари ќе ја врши селекцијата на отпадот.
Пристигна првиот дел од линијата од фирмата „Техникс“. Вториот дел се работи и треба да пристигне за околу еден месец. Во секој момент очекуваме да ја добиеме дозволата за изградба на халата каде што треба да се постави оваа линија – изјави Златко Ристески, директор на ЈП „Комуналец“.
Халата треба да биде поставена на депонијата „Алинци“ на парцела од 1200 м2 .Вкупната инвестиција ќе изнесува некаде околу 30 илјади денари, средства обезбедени од „Комуналец“.
Со поставувањето на линијата за селекција на отпад фирмата вети вработување на нови 40-ина лица, како и прилив на финансиски средства, поради што прилепчани стравуваат дека со оваа инвестиција ќе имаат дополнителен финанасиски товар поради зголемување на комуналните такси.
А.Ш.