Космонаутот Алексеј Леонов ја откри причината за смртта на Јуриј Гагарин, првиот човек кој што ја посети вселената.
Гагарин загинал во авионска несреќа во 1968 година, откако со авионот МИГ -15 се обидел да го избегне авионот кој што летал во негова непосредна близина, а не јатото птици или метеоролошкиот балон како што велеше досегашната верзија.
Причината за несреќата за прв пат официјално е објавена, а за неа зборуваше познатиот космонаут Леонов, кој инаку е член на комисијата која ја истражува смртта на Гагарин.
Леонов дваесет години се обидуваше да добие дозвола да ги изнесе деталите за официјалната истрага за смртта на првиот космонаут и на тој начин ја реши мистеријата која што ја пратеа бројни шпекулации.
Државната комисија утврди дека екипажот на пробниот лет на авионот МИГ-15 УТИ во кој биле Гагарин и инструкторот Владимир Серјогин, се обиделе да го избегнат авионот СУ -15 кој во еден момент премногу им се доближил.
-Пилотот на авионот СУ -15 не ги почитуваше прописите спуштајќи се на висина од 450 метри. Го знам тоа бидејќи присуствував на инцидентот, а зборував и со другите очевидци. СУ -15 додека се спушташе се доближи до авионот на Гагарин и тоа на само 10 до 15 метри , во облаците, изјави Леонов, кој доби одобрување да раскаже што се случило, но под услов да не го открие идентитетот на пилотот на авионот СУ -15 кој што ја предизвика несреќата.
Единствено што се знае е дека пилотот сега има 80 години и е со нарушено здравје.
Елена Георгиевска