Во Домот на АРМ во Струмица денеска почна обуката на идните проектни менаџери, кои во рамките на ИПА програмата за прекугранична соработка меѓу Рпублика Македонија и Република Грција ја организира Канцеларијата за европски проекти при општина Струмица.
Како што изјавија од Канцеларијата за европски проекти во Струмица, на јавниот повик за оваа обука се пријавиле вкупно 38 лица од различни профили, кои во наредните денови ќе се запознаат со вештините на проектните менаџери.
– Бројката од 38 пријавени е за почит и со тоа луѓето од општина Струмица или поточно овдешната Канцеларија ќе знаат со какви капацитети во областа на проектниот менаџмент располага општина Струмица. Проектниот менаџмент веќе е наука, а не е само пишување на проекти, затоа што постојат модули кои се користат кај сите донатори, вклучително и ЕУ, како еден од најголемите подржувачи, изјави на денешниот старт на обуката Александар Гумберовски, независен консултант.
Идните проектни менаџери од оваа обука ќе се стекнат со вештини од областа на раководење со проектен циклус, подготовка на ЕУ апликации, расположливи ЕУ фондови и други теми од областа на проектниот менаџмент.