Деца ја собираа храната која се оставаше на гробиштата во Ѓорче Петров на денешниот верски празник Задушница. Тие чекаа верниците да се тргнат од гробовите, а потоа доаѓаа, ја ставаа храната во вреќи и ја складираа покрај оградата.
Дел од верниците реагираа, а децата кратко одговараа: „Немаме што друго да јадеме, мораме вака“.
„Не ја оставаме храната тука, за вие да ја земате. Не е убаво да земате храна од гробови“, им велеа некои од верниците.
„Па подобро е ние да ја изедеме, отколку кучињата“, им oдговори едно од децата.
По извесно време децата се тргнаа надвор од гробиштата, чекајќи да си заминат верниците. Застанаа покрај оградата и чекаа, да соберат оброци што ќе ги држи сити барем неколку дена.
Верскиот празник Задушница се одбележува денеска и утре, меѓу православните верници, како чин на достојно оддавање почит за мир и спокој на душите на починатите членови на семејствата. Празникот се одбележува и со ритуали на раздавање храна со присуство на роднини и блиски пријатели на починатите, на гробните места.
На гробиштата во Ѓорче Петров забележливи беа групирања, а голем дел од присутните не носеа заштитни маски против коронавирусот.