Под мотото „Ништо нема да се случи“ викендов во Струга се одржува третата средба на хакерите и технолошките ентузујасти од Македонија, Србија, Косово и Бугарија.
Целта на собирот е ентузијастите во технологијата да ги споделат своите искуства, да разговараат за изумите и иновациите што треба да ги подобрат перформансите на комјутерските програми, како и на различни теми од областа на технологијата.
Јованка Гулицоска, претседателка на „Слободен софтвер – Македонија“ и домаќин на средбата вели дека терминот хакер, во јавноста честопати се толкува на погрешен начин.
-Хакерот може да се дефинира како ентузијаст кој сака да го прави и промовира нештото во своето поле на интерес. Хакерите се луѓе кои сакаат да дојдат до некој свој оригинален изум кој ќе им олесни одреден процес во секојдневието, објаснува Гулицоска.
Според Владимир Василев од Софија, основач на еден од четирите бугарски хакерски клубови, хакерите се луѓе кои се борат за приватност и против цензурата.
– Во реалноста ние докажуваме дека хакери не се тие кои ги кршат компјутерите или крадат информации. Треба да се прави разлика помеѓу хакерите и оние другите, кои ние ги викаме кракери, кои понекогаш се занимаваат и со нелегални работи, објаснува Василев.
По Струга, средби на хакерите од регионот, летово ќе се одржат во Сплит, а потоа и во Софија.