Раководителот на американските безбедносни служби Џејмс Клепер одлучно ја бранеше програмата на Владата на САД за надгледување и контрола, откако во јавноста беше откриено дека постојат податоци за снимки од телефонски разговори и интернет комуникација.
Во изјавата за медиумите, Клепер рече дека разоткривањето на еден таен судски документ, околу пристапот и прибирањето на податоци и сознанија од страна на безбедносните служби до телефонската и интернет мрежата, е „непоправлива штетна закана“.
Интернет компаниите веднаш реагираа со соопштение во кое категорично ја отфрлаат можноста дека тие им дале можност на владините безбедносни агенции да имаат пристап до нивнте сервери.
Реакцијата на Клепер доаѓа по откритието на американскиот „Вашингтон Пост“ и на британскиот „Гардијан“ за постоењето на еден „таен судски налог“, според кој од телефонската компанија Веризон е побарано да и им овозможи на безбедносните служби и пред се на Националната агенција за безбедност (НСА), достап до нејзините податоци, на „дневна основа“.
Двата весника твдат дека НСА и американското ФБИ имаат директен достап и до серверите на дури девет интернет компании, во рамките на програмата позната како Призм (Присм).