Скопје, 29 јануари 2021 (МИА) – Повремениот сенегалски репрезентативец Алберт Боугазели и неговиот сонародник Фаустин Сенгхор се најновите засилувања за пролетниот дел на сезоната во редовите на есенскиот вицешампион во Првата македонска фудбалска лига (ПМФЛ), Шкупи.
Сенегалскиот тандем, како што соопшти попладнево Шкупи, оставил добар впечаток на подготовките на екипата во Анталија и двајцата фудбалери потпишале двегодишни договори, со можност за продолжување на соработката за уште две години.
Напаѓачот Боугазели (24), кој има два настапи за националниот тим, доаѓа од редовите на сенегалскиот прволигаш Џенерејшн Фут, додека дефанзивниот играч за врска Сенгхор (27) премина во Шкупи од редовите на босанскиот прволигаш Челик.
Шкупи во јануарскиот преоден рок остана без услугите на најдобриот стрелец во есенскиот дел од сезоната во ПМФЛ, Дембо Дарбо, откако репрезентативецот на Гамбија премина во редовите на белорускиот првак Шахтјор Солигорск.