Младински образовен форум, денеска на платото пред УКИМ, го организираше првото студентско шоу, на кое студентите имаа можност отворено да зборуваат за секојдневните проблеми со кои се соочуваат.
Под мотото #суперстудент, во имровизираното студио со водителот Огнен Јанески, студентите имаа можност да зборуваат за голготите со кои се соочуваат и за скриените патчиња на факултетските лавиринти.
Сања Божовиќ, програмски асистент на програмата за истражување, анализа и креирање на младински политики во МОФ, вели дека идеата за настанот е преку креативни фото и видео работилници студентите да се изразат себе си.
„Решивме настанот да го кристиме #суперстудент за да самите студенти се почувствуваат како супер студенти и да ни кажат што би направиле кога би ја имале таа улога“, вели Божовиќ.
Студентите, на поставеното стрип пано, имаа можност да се фотографираат како студентски лидер, како и да испишат порака што би направиле ако се дел од студентска организација, но и да понудат интересни креативни решенија за подобро образование.
„Со ова студентите ќе можат да се изразат себе си и да ни кажат дури и за микро проблемите кои ги имаат. Преку пораките кои ќе ги добиеме ќе допреме до суштината на секојдневните студентски проблеми“, порача Божовиќ, лоцирајќи ги проблемите како недоаѓање на професорите на предавања или краткото време на работење на студентските служби како секојдневие на студентите.
Таа посочи дека студентите треба да си бараат повеќе права во однос на студентскиот стандард, да имаат поволности, како и Студентскиот парламент кој според законот е официјален студентски претставник, целосно да ги застапува.
Темјана Поповска