Германската канцеларка Ангела Меркел изјави дека е „бесна и тажна“ поради настаните во Вашингтон, каде вчера четворица луѓе загинаа, а десетици беа повредени откако приврзаници на актуелниот американски претседател Доналд Трамп упаднаа во зградата на американскиот Конгрес, во обид да го запрат процесот на потврдување на победата на Џо Бајден на претседателските избори.
Меркел, зборувајќи на состанок со претставници на германските конзервативни партии, рече дека во основата на демократијата е дека има победници и губитници, како и дека „длабоко жали“ поради тоа што Трамп се уште не го признал поразот.
Германската канцеларка рече и дека „поттикнувањето сомнежи“ за изборните резултати ги овозможило вчерашните немили настани во Вашингтон.
Меркел ја поздрави изјавата на новоизбраниот претседател Џо Бајден и кажа дека тоа што Конгресот можел веднаш да ја продолжи работата, е „знак на надеж“.
Според германската канцеларка, потврдата на победата на Бајден значи дека САД за две недели можат да отворат ново поглавје во својата демократија.