Мексиканската влада соопшти дека ќе спроведе план за решавање на проблемите со мигрантите запрени во земјата како резултат на политиките на американскиот претседател во заминување Доналд Трамп и истакна дека Мексико не е виновен за протокот на луѓе.
Мексиканското Министерство за внатрешни работи соопшти дека Министерството за надворешни работи ќе разработи план како да се третираат мигрантите кои останаа во државата поради таканаречените мерки на Трамп „Остани во Мексико“, откако новоизбраниот американски претседател Џо Бајден вети дека ќе ја откаже програмата.
– Мексико ќе работи со владите на САД, Гватемала, Хондурас и Салвадор за решавање на миграциските предизвици, рече мексиканската министерка за внатрешни работи Олга Санчез.
– Ние не сме причина за проблемот, но ја повторуваме нашата подготвеност да бидеме дел од решението, нагласи таа.
Според политиката „Остани во Мексико“, мигрантите со барања за американски азил престојуваат во Мексико додека се разгледува нивното барање.
– Ќе формулираме план за мигрантите кои се уште се во Мексико. Протокот на мигранти кои се обидуваат да стигнат до САД преку Мексико се очекува да се зголеми во иднина, потенцира Санчез.