Градоначалникот на Скопје, Петре Шилегов ги демантира обвинувањата од ВМРО-ДПМНЕ дека тој како градоначалник склучил договор со неговото адвокатско друштво за консултантски услуги и дека врз основа на тој договор од градската каса се исплаќаат пари на неговата фирма.
„Вистината кога е ДПМНЕ во прашање е секогаш на обратна страна. Јас уште како пратеник во Собранието имам склучено договор за консултантски услуги со сопственото адвокатско друштво кое ме плаќа мене. Еве го договорот во 2015 и месечниот приход кој е уредно пријавен во анкетниот лист и предаден во Антикорупцсика комисија кога станав градоначалник. За тие средства од 50.000 денари уредно плаќам данок. Ги повикувам, да се радуваат на развојот на нашиот град, на она што градот изминативе три години чекор по чекор го постигна. Град Скопје и јас како градоначалник немаме склучено никаков договор, ниту еден денар од градската каса не е влезено во моето адвокатско друштво. Јас земам сопствени пари од моето адвокатско друштво“ – рече градоначалникот Шилегов.
Портпаролот на ВМРО-ДПМНЕ, Наум Стоилковски денеска на прес конференција обвини дека Шилегов како градоначалник исплаќа 50 000 денари месечно на неговото адвокатско друштво за консултанстски услуги.
