Болеста кај пастрмката која е откриена во рибниците не е опасна по здравјето на луѓето. Причинува економски штети, доколку не се преземат навремено соодветни мерки, изјави денеска директорот на Агенцијата за храна и ветеринарство Зоран Атанасов.
На прес-конференцијата на која даде отчет за сработеното, Атанасов рече дека засега кај нас нема голема смртност на рибите, но оти штом е детектирана болеста, нема да се дозволи масовна смртност.
– Се работи за болест која ја загрозува само популацијата на риби и тоа загрозени се пастрмките и евентуално крапот како носител на вирусот. Сега засега нема голема смртност кај рибите, меѓутоа штом ја детектираме болеста, нема сигурно да дозволиме да почне масовно да се појавува смртноста, истакна Атанасов.
Од направените тестирања во 46 активни рибници во земјава, кај 18 е детектирана болеста и тие се прогласени за заразни, односно од кај нив рибата може да се продава само во продавници и тоа во замрзната форма.