Прототипот на ракетата „Старшип“ на Спејс Икс експлодираше при обид за повторно слетување синоќа, неколку минути по навидум обичното тест полетување од лансирниот погон на компанијата во Тексас.
Уништената ракета „Старшип“ беше прототип на тешка ракета висока 52 метри, развиена од приватната вселенска компанија на Елона Маск за транспорт на луѓе и 100 тони товар во идните мисии на Месечината и на Марс.
Ракетата експлодира кога слета на подлогата за слетување по контролирано спуштање. Тест летот беше наменет да достигне висина од 12,5 километри, напојуван за првпат од три новоразвиени мотори на СпејсИкс.
Маск кратко по несреќата објави на Твитер дека „притисокот во резервоарот за гориво е мал“ за време на спуштањето, „поради што брзината на контакт беше голема“.
Тој додаде дека СпејсИкс ги добил „сите податоци што им се потребни“ од тестот.