Меѓународниот олимписки комитет, во февруари годинава донесе одлука да го исфрли борењето од олимпиското семејство почнувајќи од 2020 година.
Реакциите беа жестоки, не само од претставниците на овој спорт, кој е олимписки во две дисциплини, слободен и грчко-римски стил, од самите почетоци на движењето. Обвинувањата беа дека МОК ги фаворизира американските спортови, за сметка на борењето, како традиционален спорт на ЛОИ.
Претседателот на Меѓународниот олимписки комитет, Жак Рог, изјави дека Светската боречка федерација ги направила потребните промени во организацијата и ги зголемила шансите овој спорт да го зачува олимпискиот статус.
Рог вели дека „борачите“ добро реагирале при решавањето на прашањата кои што доведоа до тоа МОК во февруари годинава да одлучи да го исфрли спортот од програмата на Олимписките игри во 2020-та година.
Тој истакнува дека Светската боречка федерација на својот конгрес минатиот викенд „ги поправила недостатоците“, усвојувајќи низа промени во правилата.