Двајца се повредени во тешкиот инцидент кој денеска се случил во словенечкиот град Велење – млад човек со нож нападнал полициска патрола, а полицајците морале да пукаат во воздух за да го совладаат.
Според извештаите, полицијата околу пладне добила повик дека на Титовиот плоштад во градот, еден човек кршел се пред себе и се заканувал дека ќе изврши самоубиство.
Кога полицијата пристигнала, човекот ги нападнал полицајците со нож, а тие одговориле со предупредувачки истрел во воздух, по што напаѓачот побегнал.
Но, полицајците набргу го стигнале и тој тогаш повторно ги нападнал, забивајќи го ножот во главата на една полицајка, која е пренесена во болница. На ова, полицајците одговориле со истрел во човекот, кој бил ранет, но и покрај тоа се обидувал да избега.
На крајот, напаѓачот бил совладан со употреба на солзавец во спреј, а објавени е снимка на која неколкумина полицајци го држат додека не пристигне Брзата помош.
Засега не се познати мотивите за однесувањето на човекот и за неговиот напад врз полицајците.