Пратеничката Моника Зајкова од ЛДП е позитивна на коронавирусот и е хоспитализирана на Инфективната клиника во Скопје, откако ѝ се влошила здравствената состојба.
„Ви пишувам откако собрав малку сила, лежејќи на клиниката за инфективни болести каде што сум хоспитaлизирана поради заразеност од коронавирусот“, напишала Зајкова на социјалните мрежи, а пренесе нејзиниот сопартиец Горан Милевски.
„Мони, ти посакувам брзо заздравување и враќање на секојдневните собраниски и партиски обврски.
Не го губи борбениот и ведар дух и избори се и со овој предизвик“, напиша тој.
Таа напишала дека и нејзините родители се позитивни на коронавирусот, но за среќа имале полесни симптоми.
„Иако ги следевме и почитувавме сите протоколи, најверојатно некаде, за жал, сме потфрлиле. Како се чувствувам? Tелесната температура не ми спаѓа под 38.5 C, чувствувам омалаксаност, континуирано гадење, повраќање и изнемоштеност. Констатирано ми е почетна фаза на пневмонија. Ова не сакам да звучи како заплашување, туку повеќе како отрезнување, затоа што понекогаш може да биде предоцна“, пишала Зајкова, а пренесе нејзиниот сопартиец.