Новиот предлог на токсикологот Нико Беќаровски за намалување на смртноста од Ковид – 19 поради касно јавување во болниците е формирање мобилни екипи од лекар, лаборант и РТГ техничар кои ќе ги посетуваат болните кои се лекуваат дома. Тој предлага мобилните екипи да функционираат на ист принцип како што здравствените власти се бореле со туберкулозата кога камион патувал од населба до населба и се вршеле снимања на градите, ран скрининг и превенција од ТБЦ.
„Како што ќе расте бројот на заболени од Ковид – 19, така ќе биде неопходно се поголем број од заболените да се лекуваат во домашни услови, а тоа неминовно ќе води и до погрешни проценки за тежината на болеста. Затоа можеби е добро да се размисли за формирање на мобилни екипи, (доктор, лаборант, ртг техничар) кои ќе ги посетуваат болните во нивниот дом, со цел да се направат неопходните лабораториски иследувања и (РТГ или дигитална флуорографија) во домот на заболениот. Кај сите каде што со пулсоксиметрите лабораториските анализи и РТГ/ФЛУОРОГРАФИЈА, ќе се установи потреба за кислородна поддршка, ќе може да се инсталираат домашни концентратори на кислород, за кислородна поддршка“, предлага токсикологот Беќаровски.
Со мобилните екипи, според Беќаровски, ќе може успешно да се детектираат сите компликации, а граѓаните нема да се чувствуваат заборавени од системот, а тоа, пак, ќе придонесе до драстично намалување на притисокот врз болниците, каде навистина би биле сместени само најтешките форми на заболувањето.
И овој предлог на Беќаровски е неприфатлив за Министерството за здравство.
„ Матичните лекари се доволни за комуникација со пациентите и проценка на нивната здравствена состојба. Ниту еден здравствен систем во светот нема ваква форма домашна посета, посебно сега кога сите лекари се ангажирани во болничките установи“, велат од Министерството за здравство за „А1он“.
Болните кои се лекуваат дома, пак, се жалат дека матичните лекари им се достапни само телефонски за инструкции како да постапат ако им се покачи телесната температура повеќе од 38,5 степени.
Првиот предлог на Беќаровски за намалување на смртноста беше државата да набави пулсоксиметри и да им ги подели на болните кои се лекуваат дома за да можат да го следат пулсот и нивото на кислород во крвта како два основни параметри за состојбата во која се наоѓаат.
Министерот за здравство Венко Филипче за пулсоксиметрите смета дека се болничка опрема и дека состојбата на пациентот може да ја одреди само лекар. Тој денес рече дека за три недели новите мерки треба да дадат резултат и очекува намалување на бројките.
Вечерва Министерството за здравство јави за нов рекорд по број на заболени. Изминатото деноноќие се регистрирани 934 новозаболени и петмина починати.