Министерот за здравство Венко Филипче вечерва објави фотографија на „Твитер“ насловена како „Состанок на ВМРО-ДПМНЕ за барање одговорност од власта за коронавирусот“, на која се гледа како од над 20 лица присутни на состанокот, едвај осум луѓе носат маски.
Маска не носи ниту Александар Пандов, кој го води Патриотскиот институт на партијата, а се наоѓа на чело на фотографијата.
Состанок на ВМРО-ДПМНЕ за барање одговорност од власта за коронавирусот. pic.twitter.com/Mqmset3pBI
— Венко Филипче (@VFilipche) October 16, 2020
Состанокот, според фотографијата што ја објави Филипче, се одржува во затворена просторија, и покрај препораките да нема поголеми групирања од повеќе од четири лица, особено во затворени простории, со оглед на тоа што истражувањата покажуваат дека коронавирусот многу полесно се пренесува на тој начин, доколку не се носат заштитни маски и каде што има поголеми групи луѓе.
Во неколку држави веќе во сила се препораките заштитните маски да се носат и на отворен простор. Во земјава овие мерки најверојатно ќе стапат на сила наредната недела, откако тоа го препорача Комисијата за заразни болести.