По седми пат во Прилеп од утре до 17 ти мај ќе се одржи манифестацијата „Денови на Крали Марко“ во организација на локалната самоуправа. Повеќе настани ќе ја одбележат манифестацијата за легендарниот Крал Марко, најмногу опеан во приказните, легендите преданијата.
– Утре во библиотеката „Борка Талески“ на пладне ќе биде промовиран анимираниот филм за Крали Марко на кој напорно работеа ученици од Прилеп и од Краљево, Република Србија. Во организација на библиотеките од овие два града ќе биде отворена и изложба за Крали Марко, соопшти на денешната прес конференција Снежана Ристеска, советник за култура во локалната самоуправа.
Учениците од ОУ „Блаже Конески“ во петок ќе подготват ликовна и литературна програма на тема „Децата го цртаат Крали Марко“. Програмата ќе ја оджат во подрачното училиште во населбата Варош.
– Ова на младите ќе им го доближи времето во кое живеел легендарниот крал. И тоа преку историски час, народни приказни и легенди каде е главен јунак и со презентирањето на краткиот анимиран филм, вели Ристеска.
На 17 мај вечерта од 20 часот на мултимедијалното плато во населбата Варош, под Марковите кули, ќе се одржи акустичен концерт, а ќе настапат Сашо Гигов-Гиш, Калина Велковска, Предраг Икономовски, Драган Стојковски, Гоце Наумов и Ненад Неделков.