Група граѓани во Тетово покренаа иницијатива за облагородување на јавниот простор во градските маала, со цел, како што велат, да му се спротивстават на гушењето на маалскиот дух предизвикано од агресивната урбанизација во градот.
„Со години наназад, жителите на Саат Маало живеат во услови на постојана гужва од паркирани возила, голема нечистотија и агресивна урбанизација што го гуши духот на едно од најстарите тетовски маала,“ велат иницијаторите на граѓанската акција наречена Пубоо / Heshem / Daha Güzel.
Првиот настан на иницијативата е закажан за недела, 27 септември, со графичко разубавување на трансформатор на ЕВН во тетовското Саат Маало.
„Идејата да се облагороди централниот простор околу некогашната саат кула и џамијата, како еден од највпечатливите делови од градот, потекна од граѓаните кои живеат во маалото и така се роди граѓанското здружение Пубоо. Решивме да бараме начини како може да се направи просторот похуман, да се разубави и да стане попријатно место во кое ќе растат нашите деца, а со кое ќе се гордеат сите тетовци,“ велат организаторите.
Група од четворица млади, талентирани и искусни графички дизајнери, ќе придонесат со нивното знаење и понудија идејно решение за изгледот на трансформаторот, велат од иницијативата, од каде најавуваат дека таа ќе продолжи со слични акции и во другите делови од градот.