Лидерот на Левица, Димитар Апасиев, вели дека добива закани за него и неговото семејство, откако ги напишал фејсбук статусите за кои во моментов има отворен предмет во Јавното обвинителство, а каде денеска одговараше пред надлежен обвинител за предметот за ширење на говор на омраза.
Апасиев денеска пред Обвинителството изјави дека тој во неговите пораки до јавноста секогаш се држи до практиката на Европскиот суд за човекови права и ќе продолжи тоа да го прави и понатаму, односно нема да престане со фејсбук статусите кои ја скандализираат јавноста. Кажа дека не очекува обвинение против него, туку кривични пријави за тие што го пријавиле за ширење омраза.
Мерсиха Смаиловиќ и Тања Милевска преку Хелсиншкиот комитет се подносителите на пријавата против Апасиев. Тој по парламентарните избори кога стана пратеник, на Фејсбук напиша „Џабе ни се лижете, сите ќе ве стреламе“, што беше протолкувано како закана и ширење говор на омраза.