Градоначалникот на Општина Велес, Славчо Чадиев денеска му предаде 12.000 денари на Митрополитот Повардарски Агатангел, средства наменети за велешката црковно-народна кујна што беа собрани од овогодинешната манифестација „Велигденско јајце“.
Примопредавањето се изврши пред кујната и граѓаните кои секојдневно ја посетуваат и земаат топол оброк.
-Познавајќи ја работата на Повардарската епархија на чело со владиката решивме како општина собраните средства да ги донираме токму во црковно-народната кујна и со тоа да направиме еден хуманитарен гест, рече градоначалникот Чадиев.
Средствата ќе одат исклучиво за потребите на кујната и за луѓето кои се хранат таму.
-Му благодарам на градоначалникот што во неговите почетни денови како градоначалник ја покажува љубовта, грижата за своите сограѓани, изјави владиката Агатангел.
Градоначалникот Чадиев и владиката Агатангел истакнаа дека успешната соработка ќе продолжи и во иднина.
-Токму кога јас бев претседател на велешкиот совет се донесе одлуката да се отстапи општинскиот објект за изградба на црковно-народна кујна, а ветувам дека и во иднина ќе соработуваме доста успешно, потенцираше Чадиев.
Владиката Повардарски Агатангел упати отворен апел до сите добронамерни граѓани да помогнат парично или со храна и облека за социјално загрозените велешани.